قواعد السواقه في مصر !!!!!!!!!!

قواعد السواقه في مصر
________________________________________
القاعدة الأولى:

لو عربيتك كبيرة أو قديمة، أستخدم المبدأ القانوني: اللي خايف على عربيته يوسع!!

ملحوظة: ابعد عن سكة العربيات المخرشمة ، بيسوقوا بنظرية ضربوا الأعور على عينه!!

--------------------------------------------------------------------------------

القاعده الثانيه:

البوز بيز Booze Base: اللي يدخل ببوز عربيته الأول للتقاطع هو صاحب أولوية المرور! احرص على أن تكون صاحب أول بوز.

ملحوظة: لا تطبق الـ Booze Base مع أي لوري أو أتوبيس، حرصاً على بوزك لا مؤاخذة.

--------------------------------------------------------------------------------

القاعدة الثالثة:

الإشارات تكشف نواياك للأعداء، أياك أن تستخدمها!

--------------------------------------------------------------------------------

القاعدة الرابعة:

لا تترك مسافة للأمان بينك و بين السياة التي أمامك فهذا له عدة مخاطر:

1. عربية ثانية حتملا الفراغ في ثواني و برضوه ما يبقاش فيه مسافة بينك و بين الي قدامك، كل الي كسبته انك اتأخرت لورا شوية.

2. حتدي فرصة للعيال يعملوا غرز قدامك.

3. كل المشاة حيغمضوا عينيهم و يعدوا من الحته دي.

4. الي وراك حيقعد يزمر - لو كان مؤدب -
أو تسمع شوية أسامي حيوانات لو كان سواق تاكس - مؤدب - ،
أو حيخبطك من ورا لو كان سواق ميكروباص - و دول مفيش حد منهم مؤدب -.

الإشارات مش معمولة علشان تنظم المرور ، معمولة علشان شكل القاهرة يبقى متحضر بس!

اعتمد
على العساكر ( مع تحملك كامل المسؤلية لو واحد منهم شاورلك تعدي و بلدياته
الناحية الثانية فتح السكة للوري ) أو يفضل أن تستعمل البوز بيز ( راجع
القاعدة الثانية ).

--------------------------------------------------------------------------------

القاعدة الخامسة:

اذا
كنت مش واقف في الصف الأول في الاشارة اعمل حسابك تزمر بشكل متواصل و
هستيري أول ما الأشارة تفتح، لأن الناس الي قدام بيبقوا واقفين في الاشارة
من زمان و جايز جداً يكونوا ناموا!!

--------------------------------------------------------------------------------

القاعدة السادسة:

معظم الحوادث تحدث في التقاطعات أول الأشارة ما تحمر، كل ما عديت الإشارة الحمراء أسرع كل ما قلت فرصة انك تتخبط!

--------------------------------------------------------------------------------

القاعدة السابعة:

الشارع
مكان مقرف، سوق بأسرع ما يمكن حتى تتخلص من هذا الهم بسرعة، الناس الي
ماشيين بالراحة مرضى نفسيين بيستمتعوا بالعذاب ، يستاهلوا الي يجرى لهم.

--------------------------------------------------------------------------------

القاعدة الثامنة:

من
حقوقك الدستورية أن تركن أمام باب المحل الذي تريد أن تشتري منه، اذا سبقك
واحد ابن ستين في سبعين و ركن قدام الباب، فمن حقك أن تقفل عليه و تركن صف
ثاني أو ثالث، و مش مهم لو الشارع اتقفل، ايه يعني أما الناس تتعطل عشر
دقائق علشان تستمتع بحقوقك الدستورية؟ هيا يعني الدنيا طارت ولا كان وراهم
الديوان؟

--------------------------------------------------------------------------------

القاعدة التاسعة:

من
حقك أيضاً أن تخرج من مكان انتظارك في أي لحظة تشاء، اكسر الدركسيون شمال
و اطلع، أي حد ماشي في الشارع لازم يقف لك فوراً، راجع البند السابق.

--------------------------------------------------------------------------------

القاعدة العاشرة:

إحترس من ثلاث أنواع من السائقيين بيسوقوا و كأنهم مش ممكن يموتوا:

1. العيال الروشين الي بيلعبوا Computer Games و فاكريين إن ممكن يكسبوا Life زيادة لو ساقوا أسرع.

2. موتوسيكلات توصيل الطلبات ( Home Delivery ).

3. سواقين الميكروباص .

ملحوظة: إوعى تحاول تثبت لحد منهم إن فكرته غلط. فاهمني!!!.

--------------------------------------------------------------------------------

القاعدة الحادية عشر:

لما
تشوف حادثة لازم تهدي و تتفرج - مش مهم تساعد - الحجات دي دمها أخف من
الأخبار المملة بتاعة التلفيزيون ، و بعدين لما الطريق وراك يقف تحمي
المجتمع من حادثة تانية.

--------------------------------------------------------------------------------

القاعدة الثانية عشر:

الكناسين لازم يحللوا اللقمة الي بياكلوها، حاول تنفعهم و ترمي أي حاجة من الشباك.

--------------------------------------------------------------------------------

القاعدة الثالثة عشر:

لما تخلص سيجارة أوعى تحطها في الطفاية، ارميها من الشباك أول ما تشوف واحد بموتوسيكل معدي جنبك ( علشان يحرم يعمل غرز ).

--------------------------------------------------------------------------------

القاعدة الرابعة عشر:

من حقك أن تعبر الشارع في أي وقت و من أي مكان.

--------------------------------------------------------------------------------

القاعدة الخامسة عشر:

اذا كان هناك سيارة قادمة اعمل نفسك مش واخد بالك و عدي براحتك خالص، ما تخافش، هوا حيقف، هو اهبل يدوسك و يودي نفسه في داهية؟

--------------------------------------------------------------------------------

القاعدة السادسة عشر:

اياك أن تنظر نحو السيارات القادمة، أعبر الطريق و ظهرك لها حتى لا يشك أحد قائدي السيارات أنك تراه و يحاول يخوفك علشان تقف انت.

--------------------------------------------------------------------------------

القاعدة السابعة عشر:

حتى لو شفته أوعى تخاف - خصوصاً لو معاك بنت - تبقى راجل ملو هدومك و تخاف من حته عربية؟

عرض قفاك و سيبه يتفلق.

--------------------------------------------------------------------------------

القاعدة الثامنة عشر:

الرصيف
ليس للمشاه، بل لركن السيارات و فرشات الباعة الجائليين و المحلات... الخ،
لذلك يحق للمشاة السير في وسط الشارع، لمزيد من الأمان، راجع القاعدة
السابقة.

--------------------------------------------------------------------------------

القاعدة التاسعة عشر:

إذا
كان الماشي من فئة النقل الثقيل، فمن أبسط حقوقة إنه يمشي على أقل من مهله
و يهتز براحته. واللي مش عاجبة الهز يدور على لوري يخبطة

....

t
r
a
n
s
f
e
r
r
e
d

ههههههههه والله هتودينا في داهيه على فكره انا فكرت اعمل نصيحه من نصايحك اولا العربيه اتخبطت وقريت عليها سوره الفاتحه اما عن المشى البطىء فالراجل السواق ادانى والحمد لله مما اعطاه الله
موضوع جميل تقبل مرورى

أنا عملت ده وسوقت توك توك ودعكت الدنيا يا عم جيمي والواد بتاع التوك توك صاحبي نزلني منه وحلف عليا ما اركبه ثاني

هههههههههههه توك توك هى دى اخرتنا

هنشتغل على توك توك

ونبقى علماء تكاتك

شكرا لمرورك يابوبوس

وبالنسبة ليكى يا مشاعر ما تخافيش اعملى بالنصايح دى

وانا هاجيلك ع المستشفى عدل

وابقى اعملى اشتراك فى المستشفى

طبعا انا معملتش حاجه انت عارف بقى الكميائين معندهمش وقت انهم ينزلو الشارع بس كل الى عملته تخيلت الشارع بنصائحك الغاليه هههههههههههههههه لقيت الدنيا دمااااااااار والشارع حيبقى سوق والقوى حياكل الضعيف والى حيطلع كسبان
عربيات النقل الثقيل فى قاعده البوز بس القانون بتاعك فى انتقضات كتييير منهم القاعده9والقاعده14 وما بعدها

خلاص هنبقى نشوف الموضوع ده

ونحاول نحل المشكلة دى

بعد ما نعمل لجنو تنبثق منها لجنة

اصغر وينبثق من هذه اللجنة لجنة اخرى مصغرة

ونحاول نحدد معاد بعد خمساتر تماناشر سنة

نناقش فيه كل هذه الامور

ههههههههههههههههههه

حلووووووووو قوووووووي

يخرب عقلك الموضوع تحفة

ويودي ال..........على طووووووووووول

ماشى يا شهير

نورتى المكروباص

او الموضوع

أو اللومان

اختارى اللى يعجبك

القاعدة الخامسة
ودينى لاخبط اى حد اسمه محمود لو جبت عربية
اظن دى قاعدة مخترعينها انا وياسر

هههههههههه وانا معاك كمان هنعمل كده

كل يوم ونموت كل اللى اسمهم محمود فى البلد هنا

ما عدا محمود جابر لأنه رجل والرجال كثير

القاعده الاخيرة
اول ماعجل العربيه يفرقع
ع الطريق السريع
ماتفكرش تعمل حاجه غير انك تشهد

ههههههههههههههههههههههههه
انا بقى بركب الهوا وده مفهوش اى قوعد ولا حاجه
ههههههههههههههههههههههه
بس بجد انا احسن واحد يركب بسكلته فى بلدى كلها
عموما تقبل مرورى يا جميل

هههههههههههه

بسكلتة

!!!

بتفكرنى بافلام الستينات بالكلمة دى

ع العموم شكرا لمرورك يا تيتو

ملاحظه انكم بتتكلمو جد ونوين تنفيذ القانون ربنا يستر عموما لو اتمسكتو ورحتو العباسيه انا اكيد مش معاكم ولو خدتو اى جوائز(لانها بلد كوسه) متنسوش الى كلتو معاها عيش وملح واوعوا تخونوا العيش والملح وتنسو ال ملاحظات الى قلتها فى القنون والى سوف ينظر اليها خمساتر تماناشر سنة

يعنى معاهم معاهم عليهم عليهم

بس من بعيد

ماشى انا هفتن عليكى اول واحدة واقول انت رئيسة التنظيم والمخطط الرئيسى

ده لو اتمسكنا طبعا

اهم قاعدة من قواعد السواقة فى مصر
انك تكون عارف اسم حد مهم ف المرور
مش شرط تكون عارفه شخصيا
المهم تكون عارف الاسم
عشان فى اى لجنة ترطن الاسم وتعدى علطول

وطبعا كل يوم تتفرج ع العميد ""أحمد عاصم ""
وبعدين تنسى خالص كل اللى هو قاله